3705. Ngamazwi “lelilizwe olele kulo ngizolinika wena nenzalo yakho” kufanekiswa ukuthi ukulunga kweNkosi kwakungokwaYo noma kwakuphuma eYeneni laYo. Lokhu kuchachiswa wukufanekiswa kokulunga komuntu ongaphandle nge “lizwe”, okuzokhulunywa ngakho khonamanje; kuchachiswa futhi wukufanekiswa kwalokho (ukulunga) okwakuseNkosini ngamazwi “olele kulo”; kuchachiswa nangokufanekiswa kwento ephuma eYeneni leNkosi ngo “kulinika wena”, nakho okuyinto okuzokhulunywa ngayo khonamanje. Isizathu sokuba “izwe” lifanekise ukulunga komuntu ongaphandle, okuzofanekiswa ngoJakobe kusukela manje, wukuthi nge “lizwe laseKhanani” kufanekiswa umbuso weNkosi (bheka izinombolo 1413, 1437, 1585, 1607, 1866). Nanjengoba engqondweni yezulu likamoya kufanekiswa umbuso weNkosi ngalelilizwe, engqondweni yezulu lamazulu kufanekiswa iNkosi uqobo lwaYo (bheka inombolo 3038)—ngokuba iNkosi iYikhokonke wakhokonke embusweni waYo, nazozonke izinto ezingaphumi kuYo nezingabhekile kuYo kaziyona ingxenye yombuso waYo. Umbuso weNkosi ubuye futhi ufanekiswe eZwini nge “zulu nomhlaba” (bheka izinombolo 1733, 1850, 2117, 2118[ekugcineni]), yize kepha lapho kushiwo ingaphakathi lalowombuso nge “zulu”, nengaphandle lawo ngo “mhlaba” (bheka izinombolo 82, 1411, 1733, 3355[ekugcineni]. Ngakhoke engqondweni yezulu lamazulu nge “zulu” kufanekiswa uBuqotho noma uMuntu weNkosi ongaphakathi, nango “mhlaba” kufanekiswa uMuntu weNkosi ongaphandle. Ngakhoke lapha ngamazwi “ilizwe olele kulo” kufanekiswa uKulunga koMuntu weNkosi ongaphandle okuzinze kubo uMuntu weNkosi ongaphandle ofanekiswa ngo “Jakobe”. Ukuthi ngo “Jakobe” kufanekiswa uMuntu weNkosi woBunkulunkulu sekukhonjiswe kaningi ngaphambili.
[2] Okunye, izwi “ilizwe” linezincazelo ezahlukene (bheka izinombolo 620 , 636, 1066, 2571, 3368, 3379), nesizathu sokwehlukahlukana kwezincazelo wukuthi iKhanani, elibizwa ngeliZwe eliNgcwele, lifanekisa umbuso weNkosi kabanzi; nalapho kuphathwa “izulu” kanye no “mhlaba” kanyekanye, nge “zulu”, njengoba sekuphawuliwe, kufanekiswa okungaphakathi, kanti ngo “mhlaba” noma nge “lizwe” kufanekiswa okungaphandle. Ngakhoke ngalamazwi kufanekiswa futhi umbuso weNkosi osemhlabeni, okungukuthi, iSonto; nangenxa yalokho kufanekiswa, ngakhoke kufanekiswa umuntu owumbuso weNkosi noma oyiSonto. Kulowomuntu nge “zulu” kushiwo okungaphakathi, kanti ngo “mhlaba” noma nge “lizwe” kushiwo okungaphandle; noma okuyinto efanayo, nge “zulu” kushiwo ubuqotho noma umuntu ongaphakathi,kanti ngo “mhlaba” kushiwo umuntu ongaphandle lokhu ubuqotho bungaphakathi komuntu ongaphandle. Njengoba “izwe” noma “umhlaba” unalezizincazelo ezahlukene, ngawo kufanekiswa futhi izinto ezenza umuntu abe wumbuso weNkosi, eziwukulunga kothando umuntu azemukela ziphuma eBunkulunkulwini beNkosi. Konke lokhu kukhombisa ukuthi kwahlukahlukene kangakanani ukufanekisa kwe “zwe” noma ko “mhlaba” eZwini.
[3] Ngamazwi “ngizolinika wena” kufanekiswa ukuthi yiYena leNkosi elaliwumsuka walelolizwe.Lokhu kuchachiswa wukuthi kufanekiswani ngo “kunika” lapho lelizwi lisetshenziswa maqondana neNkosi, ngokuba njengoba kuphawuliwe ngaphambili ukuthi iNkosi iwuKulunga koBunkulunkulu neQiniso loBunkulunkulu, uKulunga kwaYo kubizwa ngo “Yise” neQiniso laYo libizwa nge “Ndodana”. Njengoba-ke uKulunga koBunkulunkulu kungobaYo, nakanjalo kuphuma eYeneni laYo, kuyalandela ukuthi “ukulinika wena”, lapho kuphinyiswa nguJehovah futhi kuqondiswe eNkosini, kufanekisa lokho okwakungokwaYo noma okwakungokweYena laYo. Ngalokhu kungabonakala ukuthi kufanekiswani engqondweni engaphakathi ngokuvama kweNkosi ukuphawula ngokuthi uYise “uyinikile”, okungukuthi, Yona uqobo izinikile, njengakuJohane, lapho kuthiwa khona:
Baba, dumisa iNdodana yaKho, ukuze neNdodana yaKhoikudumise, njengalokho uyiphile amandla phezu kwayoyonke inyama ukuba bonke obaphe Yona ibaphe ukuphila okuphakade. Ngikudumisile emhlabeni; ngiwufezile umsebenzi ongiphe wona ukuba ngiwenze. Ngilibonakalisile igama laKho kubantu ongiphe bona kwasezweni; babengabaKho, wangipha bona. Manje sebeyazi ukuthi konke ongiphe khona kuvela kuWe. Ngokuba amazwi ongiphe wona ngibaphile wona. Ngikhulekela labo ongiphe bona, ngokuba bangabaKho; ngokuba konke okungokwaMi kungokwaKho, nokungokwaKho kungokwaMi (Johane 17:1, 2, 4, 6-10).
Konke “ukupha” kukaYise lapha kufanekisa ukuthi umsuka wakho wuKulunga kweNkosi koBunkulunkulu, kanjalo okuwuKulunga kweYena laYo.
[4] Ngakhokonke lokhu kungabonakala ukuthi zijule kangakanani izimfihlakalo ezilele zicashe emazwini ayekhulunywa yiNkosi, nokuthi yahluke kakhulu kangakanani ingqondo engaphandle engqondweni engaphakathi noma yezulu likamoya, ikakhulu ukuthi yahluke kakhulu kangakanani engqondweni yezulu lamazulu. INkosi yayikhuluma ngalendlela ukuze uluntu, olwalungenalo ngisho noluncane ulwazi lweqiniso loBunkulunkulu ngaleyonkathi, lukwazi ukuliqonda ngendlela yalo nakanjalo lulivume iZwi, nezingelosi ziliqonde ngendlela yazo, ngokuba izingelosi zabe zazi ukuthi uJehovah neNkosi nguMuntu oyedwa nokuthi uYise wabe enguKulunga koBunkulunkulu; futhi zabe zikwazi nokuthi lapho iNkosi ikhuluma ngokuthi uYise “uyinikile” noma “uyiphile” lokho kush’ukuthi izinikile, kanjalo izithathele okungokwaYo.
