1
Chatawhcha mopathaihpazy châta thyuna kyh kha: Kalatia râh liata awnanopa sahlao hnohtazy bie ei piepa hawhta nâmo chhaota vaw tao hra teh u.
2
Nohsari noh liata noh hmiatua chaipa liana chata chyhsa tota byhnâ nama hmônazie lymâ hawhta pachô ula, ei vy tita thyuna kheina rai a y lei nawpata.
3
Ei vaw tlô tawhta ahyrai a pha nama tahpa maih ei pyhkheina châzy cheipata nama ngiachhiena hmopiepa cha Zerusale khih lâ siekhei awpata ei tuah aw.
4
Ei sie hra nawpa kyh a châ khiahtala sie aw na ta, eina zi hra aw ei.
5
Masidônia râh ei chahry khai tawhna chata nâmo lâ ei vy aw. Masidônia râh cha chahry tlai tlôh aw na ta.
6
Nama hnohta deikua cha ei châh thlâh ha thei na. chasipaw chhôh zydua chhao a châ ngyu aw. Khataih lâ rai ei siena awpa maih lâta nâmo ta eina pathlie theina awpa eichi ta.
7
Atahmâ ei siepata ei cha hmô awpa ei khoh leipa na ta; Abeipa ta aryh a tah khiahtala nama hnohta vâropi châh awpa ei hnabeisei tlôh ta.
8
Châhrasala Pentikaw noh taihta Ephesi khih liana heta ei châh thlâh ha aw.
9
Ochhi kawh ngaitapa nata phahnai ngaitapa ei châta a pahy tlôh ta, dyutuhpazy hluhpi ama y hra.
10
Timawthy kha a vaw tlô khiahtala ngâh ngaitapata nama hnohta a y thei nawpata a chado teh u. Keima ta ei hriapa hawhna hra heta Abeipa rai cha hria tlôh ta.
11
Chavâta ahyhma ta mohnao kha se. Kei lâ avy thei nawpata thlahlôh ngaitapata tlao pathlie teh u; unawhzy hnohta ano hmô awpa ei hnabeisei tlôh ta.
12
Eima unawhpa Apôlôsa kha cha unawh hropazy chhaota a vy awpata a haw na ta, châhrasala atahmâ thlai a vy awpa he Khazohpa khozie châ mâh leipa ta, a rypaoh tita deikua cha a vy aw.
13
A vaih ula, ngiapâna liana chata â ipata a duah ula, nama riah a papha ula, thatlô ngaitapata y teh u.
14
Nama taopa maih cha kyhpachâna ta taopa châ khai mawh sy.
15
Unawh saih u, Stiphanasa chhôhkhazy cha Akaia râh liata a zyhpa hmia a sahtuhpa châ ei ta, mopathaihpazy chakao awpata âmosasasy ta amâ pie tahpa nama pahno na;
16
cha hawhpa chyhsazy hnohta nata raihria liata a baopa nata hria pasapa maihzy hnohna chata, a ngiarih awpata ei châ haw ei.
17
Stiphanasa zy, Fawtunata zy, Akaika zy amâ vypa ei ly kaw, nama y leipa chhao a hno leipata eina taopa vâta;
18
âmo heta ei palôhrupa nata nama palôhrupa pahra tlôh ei ta, he hawhpa chyhsazy he aly teh u.
19
Asia râh awnanopa sahlaozy heta a châ naoh ei. Akuila nata Priska ama o liata awnanopa a pakhypa sahlao chhao heta, Abeipa liana chata thata a châ naoh ei.
20
Unawh zydua heta a châ naoh ei. Sy pathaihpata nâmosasy ta a naoh chyu teh u.
21
Kei Pawla ta keima ku tlaita ei châ naoh ei.
22
Ahyrai ta Abeipa kyh a pachâ vei khiahtala chhiesapata y mawh sy. Eima Beipa cha a vy na!
23
Abeipa Zisu Krista ngiachhiena cha nama hnohta y mawh sy.
24
Krista Zisu liata ei kyhpachâna he nama zydua hnohta y mawh sy. Amen.;
