⁹ Tota die exprobrabant mihi inimici mei, et qui laudabant me adversum me jurabant :

¹⁰ quia cinerem tamquam panem manducabam, et potum meum cum fletu miscebam ;

¹¹ a facie iræ et indignationis tuæ, quia elevans allisisti me.

¹² Dies mei sicut umbra declinaverunt, et ego sicut fœnum arui.

¹³ Tu autem, Domine, in æternum permanes, et memoriale tuum in generationem et generationem.

¹⁴ Tu exsurgens misereberis Sion, quia tempus miserendi ejus, quia venit tempus ;

¹⁵ quoniam placuerunt servis tuis lapides ejus, et terræ ejus miserebuntur.

¹⁶ Et timebunt gentes nomen tuum, Domine, et omnes reges terræ gloriam tuam ;

¹⁷ quia ædificavit Dominus Sion, et videbitur in gloria sua.

¹⁸ Respexit in orationem humilium et non sprevit precem eorum.

¹⁹ Scribantur hæc in generatione altera, et populus qui creabitur laudabit Dominum.

²⁰ Quia prospexit de excelso sancto suo, Dominus de cælo in terram aspexit ;

²¹ ut audiret gemitus compeditorum, ut solveret filios interemptorum ;

²² ut annuntient in Sion nomen Domini, et laudem ejus in Jerusalem,

²³ in conveniendo populos in unum, et reges ut serviant Domino.

²⁴ Respondit ei in via virtutis suæ : Paucitatem dierum meorum nuntia mihi :

²⁵ ne revoces me in dimidio dierum meorum, in generationem et generationem anni tui.

²⁶ Initio tu, Domine, terram fundasti, et opera manuum tuarum sunt cæli.

²⁷ Ipsi peribunt, tu autem permanes ; et omnes sicut vestimentum veterascent. Et sicut opertorium mutabis eos, et mutabuntur ;

²⁸ tu autem idem ipse es, et anni tui non deficient.

²⁹ Filii servorum tuorum habitabunt ; et semen eorum in sæculum dirigetur.

¹ Ipsi David. Benedic, anima mea, Domino, et omnia quæ intra me sunt nomini sancto ejus.

² Benedic, anima mea, Domino, et noli oblivisci omnes retributiones ejus ;

³ qui propitiatur omnibus iniquitatibus tuis, qui sanat omnes infirmitates tuas ;

⁴ qui redimit de interitu vitam tuam, qui coronat te in misericordia et miserationibus ;

⁵ qui replet in bonis desiderium tuum : renovabitur ut aquilæ juventus tua.

⁶ Faciens misericordias Dominus, et judicium omnibus injuriam patientibus.

⁷ Notas fecit vias suas Moysi, filiis Israël voluntates suas.

⁸ Miserator et misericors Dominus, longanimis, et multum misericors.

⁹ Non in perpetuum irascetur, neque in æternum comminabitur.

¹⁰ Non secundum peccata nostra fecit nobis, neque secundum iniquitates nostras retribuit nobis.

¹¹ Quoniam secundum altitudinem cæli a terra, corroboravit misericordiam suam super timentes se ;

¹² quantum distat ortus ab occidente, longe fecit a nobis iniquitates nostras.

¹³ Quomodo miseretur pater filiorum, misertus est Dominus timentibus se.

¹⁴ Quoniam ipse cognovit figmentum nostrum ; recordatus est quoniam pulvis sumus.

¹⁵ Homo, sicut fœnum dies ejus ; tamquam flos agri, sic efflorebit :

¹⁶ quoniam spiritus pertransibit in illo, et non subsistet : et non cognoscet amplius locum suum.

¹⁷ Misericordia autem Domini ab æterno, et usque in æternum super timentes eum. Et justitia illius in filios filiorum,

¹⁸ his qui servant testamentum ejus, et memores sunt mandatorum ipsius ad faciendum ea.

¹⁹ Dominus in cælo paravit sedem suam, et regnum ipsius omnibus dominabitur.

²⁰ Benedicite Domino, omnes angeli ejus, potentes virtute, facientes verbum illius, ad audiendam vocem sermonum ejus.

²¹ Benedicite Domino, omnes virtutes ejus, ministri ejus, qui facitis voluntatem ejus.

²² Benedicite Domino, omnia opera ejus, in omni loco dominationis ejus. Benedic, anima mea, Domino.

¹ Ipsi David. Benedic, anima mea, Domino : Domine Deus meus, magnificatus es vehementer. Confessionem et decorem induisti,

² amictus lumine sicut vestimento. Extendens cælum sicut pellem,

³ qui tegis aquis superiora ejus ; qui ponis nubem ascensum tuum, qui ambulas super pennas ventorum ;

⁴ qui facis angelos tuos spiritus, et ministros tuos ignem urentem.