¹² Estote sicut ego, quia et ego sicut vos : fratres, obsecro vos. Nihil me læsistis.

¹³ Scitis autem quia per infirmitatem carnis evangelizavi vobis jampridem : et tentationem vestram in carne mea

¹⁴ non sprevistis, neque respuistis : sed sicut angelum Dei excepistis me, sicut Christum Jesum.

¹⁵ Ubi est ergo beatitudo vestra ? testimonium enim perhibeo vobis, quia, si fieri posset, oculos vestros eruissetis, et dedissetis mihi.

¹⁶ Ergo inimicus vobis factus sum, verum dicens vobis ?

¹⁷ Æmulantur vos non bene : sed excludere vos volunt, ut illos æmulemini.

¹⁸ Bonum autem æmulamini in bono semper : et non tantum cum præsens sum apud vos.

¹⁹ Filioli mei, quos iterum parturio, donec formetur Christus in vobis :

²⁰ vellem autem esse apud vos modo, et mutare vocem meam : quoniam confundor in vobis.

²¹ Dicite mihi qui sub lege vultis esse : legem non legistis ?

²² Scriptum est enim : Quoniam Abraham duos filios habuit : unum de ancilla, et unum de libera.

²³ Sed qui de ancilla, secundum carnem natus est : qui autem de libera, per repromissionem :

²⁴ quæ sunt per allegoriam dicta. Hæc enim sunt duo testamenta. Unum quidem in monte Sina, in servitutem generans, quæ est Agar :

²⁵ Sina enim mons est in Arabia, qui conjunctus est ei quæ nunc est Jerusalem, et servit cum filiis suis.

²⁶ Illa autem, quæ sursum est Jerusalem, libera est, quæ est mater nostra.

²⁷ Scriptum est enim : Lætare sterilis, quæ non paris ; erumpe et clama, quæ non parturis : quia multi filii desertæ, magis quam ejus quæ habet virum.

²⁸ Nos autem, fratres, secundum Isaac promissionis filii sumus.

²⁹ Sed quomodo tunc is, qui secundum carnem natus fuerat, persequebatur eum qui secundum spiritum : ita et nunc.

³⁰ Sed quid dicit Scriptura ? Ejice ancillam, et filium ejus : non enim hæres erit filius ancillæ cum filio liberæ.

³¹ Itaque, fratres, non sumus ancillæ filii, sed liberæ : qua libertate Christus nos liberavit.

¹ State, et nolite iterum jugo servitutis contineri.

² Ecce ego Paulus dico vobis : quoniam si circumcidamini, Christus vobis nihil proderit.

³ Testificor autem rursus omni homini circumcidenti se, quoniam debitor est universæ legis faciendæ.

⁴ Evacuati estis a Christo, qui in lege justificamini : a gratia excidistis.

⁵ Nos enim spiritu ex fide, spem justitiæ exspectamus.

⁶ Nam in Christo Jesu neque circumcisio aliquid valet, neque præputium : sed fides, quæ per caritatem operatur.

⁷ Currebatis bene : quis vos impedivit veritati non obedire ?

⁸ persuasio hæc non est ex eo, qui vocat vos.

⁹ Modicum fermentum totam massam corrumpit.

¹⁰ Ego confido in vobis in Domino, quod nihil aliud sapietis : qui autem conturbat vos, portabit judicium, quicumque est ille.

¹¹ Ego autem, fratres, si circumcisionem adhuc prædico : quid adhuc persecutionem patior ? ergo evacuatum est scandalum crucis.

¹² Utinam et abscindantur qui vos conturbant.

¹³ Vos enim in libertatem vocati estis, fratres : tantum ne libertatem in occasionem detis carnis, sed per caritatem Spiritus servite invicem.

¹⁴ Omnis enim lex in uno sermone impletur : Diliges proximum tuum sicut teipsum.

¹⁵ Quod si invicem mordetis, et comeditis : videte ne ab invicem consumamini.

¹⁶ Dico autem : Spiritu ambulate, et desideria carnis non perficietis.

¹⁷ Caro enim concupiscit adversus spiritum, spiritus autem adversus carnem : hæc enim sibi invicem adversantur, ut non quæcumque vultis, illa faciatis.

¹⁸ Quod si Spiritu ducimini, non estis sub lege.

¹⁹ Manifesta sunt autem opera carnis, quæ sunt fornicatio, immunditia, impudicitia, luxuria,

²⁰ idolorum servitus, veneficia, inimicitiæ, contentiones, æmulationes, iræ, rixæ, dissensiones, sectæ,

²¹ invidiæ, homicidia, ebrietates, comessationes, et his similia, quæ prædico vobis, sicut prædixi : quoniam qui talia agunt, regnum Dei non consequentur.

²² Fructus autem Spiritus est caritas, gaudium, pax, patientia, benignitas, bonitas, longanimitas,

²³ mansuetudo, fides, modestia, continentia, castitas. Adversus hujusmodi non est lex.

²⁴ Qui autem sunt Christi, carnem suam crucifixerunt cum vitiis et concupiscentiis.

²⁵ Si Spiritu vivimus, Spiritu et ambulemus.

²⁶ Non efficiamur inanis gloriæ cupidi, invicem provocantes, invicem invidentes.

¹ Fratres, etsi præoccupatus fuerit homo in aliquo delicto, vos, qui spirituales estis, hujusmodi instruite in spiritu lenitatis, considerans teipsum, ne et tu tenteris.

² Alter alterius onera portate, et sic adimplebitis legem Christi.

³ Nam si quis existimat se aliquid esse, cum nihil sit, ipse se seducit.

⁴ Opus autem suum probet unusquisque, et sic in semetipso tantum gloriam habebit, et non in altero.

⁵ Unusquisque enim onus suum portabit.

⁶ Communicet autem is qui catechizatur verbo, ei qui se catechizat, in omnibus bonis.

⁷ Nolite errare : Deus non irridetur.

⁸ Quæ enim seminaverit homo, hæc et metet. Quoniam qui seminat in carne sua, de carne et metet corruptionem : qui autem seminat in spiritu, de spiritu metet vitam æternam.

⁹ Bonum autem facientes, non deficiamus : tempore enim suo metemus non deficientes.

¹⁰ Ergo dum tempus habemus, operemur bonum ad omnes, maxime autem ad domesticos fidei.

¹¹ Videte qualibus litteris scripsi vobis mea manu.

¹² Quicumque enim volunt placere in carne, hi cogunt vos circumcidi, tantum ut crucis Christi persecutionem non patiantur.

¹³ Neque enim qui circumciduntur, legem custodiunt : sed volunt vos circumcidi, ut in carne vestra glorientur.

¹⁴ Mihi autem absit gloriari, nisi in cruce Domini nostri Jesu Christi : per quem mihi mundus crucifixus est, et ego mundo.

¹⁵ In Christo enim Jesu neque circumcisio aliquid valet, neque præputium, sed nova creatura.

¹⁶ Et quicumque hanc regulam secuti fuerint, pax super illos, et misericordia, et super Israël Dei.

¹⁷ De cetero, nemo mihi molestus sit : ego enim stigmata Domini Jesu in corpore meo porto.

¹⁸ Gratia Domini nostri Jesu Christi cum spiritu vestro, fratres. Amen.