1
Livai chi hry liata chapaw pakha ta Livai chanô a lapinô ta hnei ta.
2
Chanô cha saw phaoh ta, sawchapaw sa ta, hawsaih khochhih kawpa a châpa a nô ta hmô ta, thla thôh nyu ta.
3
Châhrasala nyu ngâ thlâh ha thei khao leipa ta. A nô ta maitanô balyh tao ta, beihlei nata tho chathli ta byh cha pachawh khâh ta, a chhôh liata hawti cha pazia ta, chavah kiah liata râbuhzy hry liata soh ta.
4
A chô liata khâpa hmo ma a tlô aw tahpa pahno awpa ta, a sietanô cha a duah ta lâpaw tawhta sai ta.
5
Cha nota, Phiraoh sawchanô cha a ngai a si awpa ta chavah lâ zu ta, a chakaotuhpa laihsazy cha chavah ngiahkâ chheipâh liata a hlaihlâ ei ta. Phiraoh sawchanô ta râbuhzy hry liata maitanô balyh cha hmô ta, a chakaotuhpa laihsa pakha tuah ta kei palasa ta.
6
Maitanô balyh cha pahy ta, hawti a cha ngâ kawpa hmô ta. A ngiachhie ngaita ta, “He hawti he Hebrai saw a châ hih,” tah ta.
7
Hawsaih sietanô ta Phiraoh sawchanô hnohta, “Hawsaih châ hâpa awpa Hebrai chanô nawh hâtuhpa cha awpa aw sah y?” tah ta.
8
Phiraoh sawchanô ta a hnohta, “Kei aw teh,” tah ta. Laihsa cha vawh ta, hawsaih nô kei aw ta.
9
Phiraoh sawchanô ta a hnohta, “Hawsaih he a chhi la, na kei mohôhpa mah y. Na hlao awpazy ei cha pie aw,” tah ta. Chanô chata hawsaih cha la ta, sâhpi pazysa ta.
10
Hawtipa cha a kaw lai nahta, Phiraoh sawchanô lâ kei pie ta, a sawchapaw ta â la haw. Phiraoh sawchanô ta, “Ti tawhta ei thaopa a châpa vâta,” tah ta, a moh Mawsi a bi.
11
Mawsi cha vaw pitloh ta, noh kha cha, a unawhzy yna lâ vawh ta, ama raihria phaohrizie zy kei hmô ta. Izi chyhsa pakha ta a unawhpa Hebrai chyhsa pakha a tu ngâpa hmô ta.
12
Mohmia pasaih ta, ahy hmah y veih ei tahpa a pahno nahta, Izi chyhsa cha tusao ta, sadi liata nyu ta.
13
A mylâ ta kei pua heih ta, Hebrai chyhsa pano amâ tu ngâpa hmô ta. A do lei viapa hnohta, “Khazia na chiheihpa na tu thlâh haw?” tah ta.
14
Ano ta, “Eima chô liata ryureituhpa nata hyutuhpa ta ahy ma châ tao? Izi chyhsa na thiepa hawhna khata ma thie einâ chhuah chi?” tah ta. Mawsi cha a palôh liata, “Kha hmo kha chyhsa ta ama pahno ha tlai cha zaw,” tahpa ta pachâ ta, chi ngaita ta.
15
Phiraoh ta cha thâtih cha a pahno nahta, Mawsi cha thie a chhuah ta. Châhrasala Mawsi cha Phiraoh hmiakô tawhta a râ ta, Midia râh liata kei y ta. Noh kha cha tikhaoh kiapâh liata a tyuh ta.
16
Midia râh theihthaipa cha sawchanô pasari hnei ta, ti vaw thaih ei ta, ama paw mietaku zaw padosa awpa ta ti châkizy pabie ei ta.
17
Mietaku vaituhpazy a vy ei ta, ama mietakuzy cha topa ha ei ta. Mawsi vaw thyu ta, laihsazy cha pachha ta, ama mietaku zaw cha ti padosa ta.
18
Ama paw Rue lâ amâ vaw di nahta, ama paw ta, “Kheihtazieta tanoh cha nama vaw tlô patoh kaw dia?” tah ta.
19
Âmo ta, “Izi chyhsa pakha ta mietaku vaituhpazy ku tawhta miah a pachha. Cha dei châ vei, ti miah thaipa ta, mietaku zaw ti a padosa,” tah ei ta.
20
Ama paw ta a sawchanôzy hnohta, “Ano cha khataih liata a y? Khazia namâ vysai thlâh haw? Kei aw u la, pati vaw nie mawh sy,” tah ta.
21
Cha chyhsa hnohta y awpa cha Mawsi ta paryhsa ta. Rue ta a sawchanô Zipôrâ cha Mawsi pie ta.
22
Zipôrâ cha sawchapaw sa ta, Mawsi ta, “Râh hropa liata mapaihpa ta ei y” tah ta, a moh Kesao a bi. Khazohpa ta Izarei ahrôna a thei.
23
Daihti vâropi a châ tawhta, Izi bei cha thi ha ta. Izarei sawzy cha ama seichâna vâta a hrô ei ta, baotuhpa aw ei ta. Ama seichâna tawhta pachha awpa ta ama awna ao cha Khazohpa kô kaw tlô ta.
24
Khazohpa ta amâ hrôpa pyu cha thei ta, Abarahâ, Aisika nata Zakaw zy hnohta a biehrai kha Khazohpa ta a thei thlâh ha ta.
25
Khazohpa ta Izarei sawzy cha moh ta, âmo cha pachâ kaw ta.
