1
Unawh kyh a pachâna he y lymâ mawh sy.
2
Khichhaizy chô liata kyhpachâna papuapa my kha u, cha hawhta taopata thokhazy ta pahno leipata vâlyuhchâpazy patlôsa tlôh ei ta.
3
Patâhpata a ypazy cha patâhpa a châ hrapa hawhta a thei thlâh ha ula; riethei a taopazy cha sapa liata a y hrapa nama châpa vâta a thei thlâh ha teh u.
4
Chyhsa zydua hry liata novâhna he palyupalihpata y sala, rakhô chhao papuapalei leipata y mawh sy; apatlapazy nata apheipazy cha Khazohpa ta pachia tlôh aw ta.
5
Nama palôhrupa phaozie cha tâkâ sôh tlaichhaina a hlao leipata châ mawh sy, nama hmo hnei chhôhpa chô liana zy chata palôhtlâhpata y teh u; ano tlaita, “Khatita hmah cha pathlua leipa aw na ta, cha siesai cheita aw va na,” tah tlôh ta.
6
Chatanachata riahpha ngaitapata, “Abeipa cha na baotuhpa a châ, chi aw va na; chyhsapa ta kheihta eina tao thei aw?” eima tah tyh.
7
Nama hyutuhpa, Khazohpa bie cha chhotuhpa cha a thei thlâh ha ula, ama yzie liata hmo a puapa cha pachâpata, amâ ngiapânazie hâ a la teh u.
8
Zisu Krista cha zâhia na, atanoh na, chhâzaw chhaota a zôpata a y thlâh aw.
9
Pachuna to nata pachuna noâh ngaitapa phaohpata y khah u; pathipalôh he ngiachhiena liata pa-ipata ypa cha pha tlôh ta, niepazy ta pa-ipata y leipata, cha hawhpa kyh pachâchhipazy cha ta chazy liana chata phahnaina hmô hlei veih ei.
10
Keimo la maisâh hnei pi ta, cha liana chata achhyna byureih chakaotuhpazy chata ama nie awpa châ vei.
11
Sahroh, a thisai theihthai beichaipa ta supathaihpa liata moleina châta hlâpata a ngiakhei tyhpa pôhpazy cha opâh lâ rao tyh tlôh ei ta.
12
Chavâta Zisu chhaota ano thisaih tlaita chyhsazy cha a pathaisa thei nawpata kuh ochhi khôtho lâna cha pasa tao haw ta.
13
Chatanachata ano ama mohnaona cha phaohpata, opâh lâ a hnohta pua ei suh u.
14
He liana heta khihpi sôhpahlôpa hnei tlôh lei khâh pi ta. khihpi a vaw y awpa cha tlao eima tlua.
15
Chatanachata ano zawhzina chata reithaipata atheihna he Khazohpa lâta khâ hlâ ei suh u, cha cha a mo chakheina hmaozy theilâpa cha a châ.
16
Hmophapa taopa nata riapha he my khah ei suh u, cha hawhpa atheihna chô liana chata Khazohpa palôhtlâh ngaita tlôh ta.
17
Nama hyutuhpazy bie a ngiah ula, âmo reisai ta y teh u; thâtih a rei awpa ama châpa vâta pachârôhna chôta reih leipata thaphana chôta ama rei thei nawpata nama thlahpa ama cha vaipa tyh.
18
Thlah maniah chhâpa teh u, ato liata a sia ngaitapata y a chhuahpata, ngiaryna ryh leina pathaihpa eima hnei tahpa a dopatata a pahno tlôh pi ta.
19
A chatlie viapata nâmo lâta tuah heipata ei y thei nawpata cha cha tao awpata ei châ haw pachai ei.
20
Chatawhcha adyhna Khazohpa, Mietahkuvaituhpa rônah ngaitapa, eima Beipa Zisu, chhâzaw ta biehraina thisaih zawhzi ta athihpa hry tawhtapa a chhi heituhpa khata,
21
a mohmô liata a khonazie hawhpa mai. Zisu Krista zawhzi ta, keimo liata hriapata a khopa tao awpata hmophapa to kyh liata cha paki ei se; Zisu Krista hnohna chata rônahna chhâzaw ta y mawh sy. Amen.
22
Unawh saih u, ei châ haw ei na, pachuna bie he chhy thai lyliah teh u; nama hnohta bie a chyhta roh tlôh na ta.
23
Eima unawhpa Timawthy kha ama pathlie haw tahpa vaw pahno hra teh u, a vy patoh khiahtala ano nata eima châ vaw hmô aw.
24
Nama hyutuhpa zydua nata mopathaihpa zydua kha nâ naohpa muh vy. Itali râh tawhta a vypazy heta ama châ naoh ei. Nama zydua hnohta ngiachhiena y mawh sy. Amen.;
