3862. enombolweni 3858 ngenhla, kukhonjisiwe ukuthi nge “zizwe eziyishumi nambili kwakufanekiswa konke okuyingxenye yokulunga neqiniso, noma okuyingxenye yenkolo nothando. Kulesisahlukwana esiphezu kwaso, njengoba manje isihloko sekuyileyo naleyondodana okuqanjwe ngayo igama laleso nalesosizwe, ngakhoke kuzokwambulwa imfihlakalo yesibili, engukuthi leyo naleyondodana ifanekisani. Ezulwini konke ukushisa kwasezulwini lamazulu nokwasezulwini likamoya, noma kothando nesisa senhliziyo, kuzwakala engaphandleni lakho njengokushisa kwelanga; nokukhanya kwakhona, noma inkolo yakhona, ibonakala engaphandleni layo njengokukhanya kwelanga; futhi lokho kushisa kumumethe inhlakanipho, kanti ukukhanya okuphuma kulokho kushisa kumumethe inkalipho, nalokhu kumumethwe ngoba kugobhoza kuphuma eNkosini, eyiLanga lasezulwini (bheka izinombolo 1053, 1521-1533, 1619-1632, 2441, 2495, 2776, 3138, 3167, 3190, 3195, 3222, 3223, 3338, 3339, 3341, 3413, 3485 , 3636, 3643. Zonke lezizinombolo zikhombisa ukuthi konke ukulunga kukhiqizwa wukushisa okuphuma eNkosini njengeLanga, nokuthi lonke iqiniso likhiqizwa wukukhanya okuphuma eNkosini njengeLanga. Lezizinombolo zikhombisa futhi ukuthi zonke izinkanuko ezihambisana nothando noma nokulunga zingukuguquguquka kwalokho kushisa kwamazulu okuphuma eNkosini, nokuthi yilokhu kuguquguquka okuwumsuka wokuguquka kwesimo; nokuthi yonke imicabango ehambisana neqiniso noma nenkolo ingukuguquguquka kwalokho kukhanya kwasemazulwini okuphuma eNkosini, nokuthi yilokhu kuguquguquka kokukhanya kwamazulu okuwumsuka wenkalipho. Zonke izingelosi ezulwini zikulokhu kushisa nasesithangameni salokhu kukhanya. Izinkanuko nemicabango kwezingelosi kakunawo omunye umsuka ngaphandle kwalowo, kakunakwenzeka ngenye indlela. Lokhu kusobala ngokukhuluma kwezingelosi, ngenxa yomsuka wakho owukuguquguquka noma okuyintambiso yokukhanya kwasezulwini okugodle ukushisa noma ukufudumala, nakanjalo okuyinkulumo engenakuchazeka, ewuhlobo olwahlukahlukene, futhi ephelele ngendlela engaphezulu kwengqondo yomuntu (bheka izinombolo 3342, 3344, 3345).
[2] Ukuze lezizinto zethulwe ngendlela yokuzifanekisa kubantu basemhlabeni, leyo naleyondodana kaJakobe yaqanjwa igama elalifanekisa ukwahlukaniswa kabanzi noma izigaba kabanzi zokulunga neqiniso, noma zothando nenkolo, kanjalo okuyizigaba kabanzi zokuguquguquka kokushisa kwasezulwini lamazulu nokwasezulwini likamoya, nokuguquguquka kokukhanya kwakulawoma zulu. Okukhamelela amandla elangabi nokukhanya kwalo yihlelo noma wukuhleleka kwezigaba. Lapho ihlelo liqala ngothando konke okulandela ngokuhleleka kulelohlelo kubonakala kuvutha, kepha lapho ihlelo liqala ngenkolo konke okulandela ngokuhleleka kulelohlelo kubonakala kukhanya, nalokho kuvutha nokukhanya kwezinto ezilandelayo kwahlukahlukene. Kepha uma izinto ezilandelayo zingalandeli ngokuhleleka noma ngehlelo eliyilonalona zonke lezozinto ziyafiphala, futhi zifiphala ngezindlela ezahlukahlukene. Nokho lelihlelo nomahluko eliwudalayo kuzokhulunywa ngakho kamuva ngomusa weNkosi woBunkulunkulu. INkosi yayizinika kanjalo-ke izimpendulo ngesu le-Urimi neThumimi; kwakukanjalo futhi nokuba abantu, ngokusukela esimweni sento esiyihloko, bamukele izimpendulo ngesu lokukhanya nokunyazima kwamatshe ayigugu nakhanyayo okwakulotshwe kuwo amagama ezizwe eziyishumi nambili. Ngokuba, njengoba sekuphaliwe ngaphamabili, amagama ezizwe ayefanekisa izigaba kabanzi zothando nenkolo ezisembusweni weNkosi, nakanjalo ayefanekisa izimbonakalo kabanzi zelangabi nokukhanya okufanekiswa ngazo lezozigaba kabanzi zothando nenkolo ezulwini.
[3] Ngakhoke kumele kwethulwe kuqala ubufakazi obuvela eZwini bokuthi ihlelo lokugagulwa kwamagama ezizwe liyaguquguquka eZwini, nokuthi lokho nalokho kuguquka kwehlelo lokuphathwa kwamagama ezizwe kukhanyelelwa yisimo esithile sesihloko. Nangalobubufakazi kungabonakala ukuthi izimpendulo ezazinikwa yiNkosi ngesu le-Urimi neThumimi zaziyimisebe yokukhanya ekhanyelelwe yizimo ezithile zento—ekubeni ukuguquguquka kwemisebe kungenxa yokuguquka kwehlelo lokulandelana kwamagama ezizwe. Ngokuba konke ukukhanya kwasezulwini kuguquka ngokuhambisana nezimo okudlulwa kuzo; nalezozimo ziwuhlobo lwezimo zento oluguquka ngokusukela ehlelweni lokulunga neqiniso. Kepha ukuthi yiliphi iqiniso nokuthi yikuphi ukulunga okufanekiswa yilelo nalelogama lendodana kaJakobe kuzochacha encazelweni; okungukuthi, ngo “Rubheni” kufanekiswa inkolo evela eNkosini; ngo “Simeyoni” kufanekiswa inkolo yentando noma esentandweni; ngo “Levi” kufanekiswa uthando lukamoya noma isisa senhliziyo; ngo “Judah” kufanekiswa uBunkulunkulu bothando nombuso weNkosi osezulwini. Okufanekiswa ngamanye amadodana ayishiyagalombili kuzokwethulwa eSahlukweni esilandelayo. Okuchazwa lapha yihlelo lokwelamana kwawo, okuyileli: Rubheni, Simeyoni, Levi, Judah, Dani, Naftali, Gadi, Asheri, Isakhari, Zebhulon, Josefa, Benjamin (bheka izahlukwana 32 -35 kuso lesiSahluko esiphezu kwaso, naku 30:6, 8, 11, 13, 18, 20, 24; 35:18). Lelihlelo likhanyelelwa yisimo sesihloko okukhulunywa ngaso lapha, esiwukuzalwa kabusha komuntu; ngokuba ukuzalwa kabusha komuntu kuqala ngeqiniso lenkolo, elifanekiswa ngo “Rubheni”, kuqhubekele ekulithandeni iqiniso, okufanekiswa ngo “Simeyoni”, kuqhubekele esiseni senhliziyo, esifanekiswa ngo “Levi”, kanjalo kuqhubekele othandweni lokuthanda iNkosi, efanekiswa ngo “Judah” engqondweni ephakeme kunazozonke. Ukuqhubeka kokumithwa nokuzalwa kukamoya noma kokuzalwa kabusha komuntu esuka kokungaphandle engena kokungaphakathi kusanda kwethulwa ngenhla enombolweni 3860; okungukuthi kusuka eqinisweni lenkolo kuqhubekele ekulungeni kothando.
[4] Ngaphambi kokufika kukaJakobe kuyise u-Isaka eMamre, noma eKiriyathi Aribha, amadodana kaJakobe aphathwa kuGenesise 35:23-26 ngalelilehlelo: Rubheni, Simeyoni, Levi, Judah, Isakhari, Zebhulon, Josefa, Benjamin, Dani, Naftali, Gadi, Asheri. Kulelihlelo kwandulela amadodana kaLeya noRasheli, kulandele amadodana ezincekukazi zakhe, nalokhu kukhanyelelwa yisimo sesihloko okukhulunywa ngaso ngalesosikhathi. Ihlelo lamadodana lahlukile futhi lapho ehamba eyongena eGibhithe, kuGenesise 46:9-19; lahlukile futhi lapho amadodana ebusiswa nguyise uJakobe—ngaleyonkathi owayesebizwa ngo-Israyeli—ngaphambi kokufa kwakhe, kuGenesise 49:3-27; lahlukile futhi lapho amadodana ebusiswa nguMose, kuDuteronomi 33:6-24. Nalapho amadodana ekanise ngokuzungeleza iTende loMhlangano ayekanise ngalelihlelo: Ngasempumalanga yeTende kwakukanise uJudah, Isakhari, Zebhulon; ngaseningizimu kukanise uRubheni, Simeyoni, Gadi; ngasentshonalanga kukanise u-Efrayimi, Manase, Benjamin; ngasenyakatho kukanise uDani, Asheri, Naftali (bheka kuNumeri 2:1ekugcineni). Ukuthi amadodana ayemi ngaliphi ihlelo ukubusisa abantu eNtabeni Gerizim, noma ngaliphi ihlelo ukuqalekisa abantu eNtabeni Ebhali kungabhekwa kuDuteronomi 27:12 -13. Ngesikhathi kukhethwa izikhulu noma amakhosana kuleso nalesosizwe ukuba ayohlola izwe laseKhanani, abizwa ngalelihlelo kuNumeri 13:4-6: Rubheni, Simeyoni, Judah, Isakhari, Efrayimi, Benjamin, Zebhulon, Josefa noma Manase, Dani, Asheri, Naftali, Gadi. Kodwa izikhulu ezazihlukanisa ifa lezwe zinehlelo elahlukile (bheka kuNumeri 34:19-29). Ukuthi inkatho yawa ngaliphi ihlelo ngesikhathi kwahlukaniswa ifa lezwe ngesu layo kungabonwa kuJoshuwa, eZahlukweni 13-19.
[5] Lapho kukhulunywa ngemikhawulo yezwe elisha noma elingcwele elaliyifa elizodliwa yizizwe zamadodana kaJakobe, encwadini kaHezekeli, izizwe ziphathwa ngalelihleli: Dani, Asheri, Naftali, Manase, Efrayimi, Rubheni, Judah, Benjamin, Simeyoni, Isakhari, Zebhulon, Gadi. Zonke lezizizwe zichazwe kusukela egunjini elibheke empumalanga kuya egunjini elibheke olwandle noma entshonalanga, ngaphandle kwesizwe sikaGadi esasisegunjini laseningizimu elibheke eningizimu (bheka kuHezekeli 48:1-7, 23-26). Nalapho kukhulunywa ngamasango omuzi omusha noma ongcwele amadodana aphathwa ngalelihlelo: amasango amathathu abheke enyakatho kwakungawezizwe zikaRubheni, Judah, no Levi; amathathu abheke empumalanga kwakungawezizwe zikaJosefa, Benjamin, noDani; amathathu abheke eningizimu ezizwe zikaSimeyoni, Isakhari, no-Zebhulon; namathathu abheke entshonalanga ezizwe zikaGadi, Asheri, noNaftali (bheka kuHezekeli 48:31-34). Nangehlelo lalabo ababebekwe uphawu, izinkulungwane eziyishumi nambili kuleso nalesosizwe, kungabonwa kwisAmbulo 7:5-8. Kuzozonke lezizindawo ihlelo lokulandelana kwezizwe lencike ngokuphelele esimweni sesihloko okukhulunywa ngaso nesiqhanyiswa yilelohlelo. Lesosimo sibonakala ngokwandulelayo nangokulandelayo.
[6] Ihlelo lokulandelana kwamatshe ayigugu kwi-Urimi neThumimi liyaphathwa futhi liyachazwa eZwini, kodwa ukuthi lelo nalelolitshe laliqhamisa siphi isizwe kakuchazwanga. Ngokuba lawomatshe ayefanekisa zonke izinto zokukhanya kwelangabi lasezulwini lamazulu, okungukuthi, zonke izinto zokulunga okuphuma eqinisweni, noma zonke izinto zenkolo ephuma esiseni senhliziyo. Nangenxa yokuthi lawomatshe ayefanekisa lezozinto uqobo lokukhanya kwasezulwini kwakukhanya kuwo ngendlela emangalisayo ngokusukela esimweni sesihloko okubuzwe ngaso kwanikwa nempendulo. Ukukhanya okumhlophe futhi okunyazimayo kwakumele impendulo evumayo maqondana nokulunga neqiniso, okwakungukukhanya okuhambisana nemibala eyahlukene yamatshe, nangokuhambisana kokwahlukahlukana kwesimo sokulunga neqiniso—njengasezulwini lapho zonke izinto zakhona zihambisana nemibala ethile nangokwahluka-hlukana kwayo, okuyinto eyenzeka ngendlela engenakuchazeka nengaphezulu kokuqondwa ngumuntu. Ngokuba njengoba sekuke kwaphawulwa, ukukhanya kwasemazulwini kugodle impilo evela eNkosini, kanjalo kugodle inhlakanipho nenkalipho. Ngakhoke ukukhanya okwahlukahlukene kugodle konke okuyimpilo, okungukuthi, konke okuyinhlakanipho nenkalipho; kanti ukwahlukahlukana kwamandla elangabi, kokunyazima, nokukloba kugodle konke okuyimpilo yokulunga nempilo yeqiniso eliphuma ekulungeni, okungukuthi, konke okungokothando lokuthanda iNkosi nokwenkolo esuselwe kulolothando. Yayinjalo-ke i-Urimi neThumimi okwakusesihlangwini sesifuba semvunulo ka-Aroni maqondana nenhliziyo yakhe. Isimilo se-Urimi neThumimi sibonakala ngokuthi amagama Urimi noThumimi asho uKukhanya noKuphelela, nesihlangu sesifuba okwakuchonywe kuso lezizinto sibizwa ngesihlangu sesifuba sokwahlulela, ngoba ukwahlulela kusuka enkaliphweni nasenhlakaniphweni (bheka inombolo 2235). Isizathu sokuchonywa kwesihlangu sesifuba maqondana nenhliziyo ka-Aroni wukuthi “inhliziyo” ifanekisa uthando loBunkulunkulu (bheka inombolo 3635, nengxenye esekugcineni kwalesiSahluko esiphezu kwaso). Nangalesisizathu lawomatshe angamagugu ayebekwe ezisekelweni zegolide, ngokuba “igolide” engqondweni engaphakathi lisho ukulunga okuyisici sothando (bheka izinombolo 113, 1551, 1552), ne “tshe eliyigugu” lisho iqiniso elikhanya ngenxa yokulunga okukulo (bheka inombolo 114).
[7] Mayelana ne-Urimi neThumimi sifunda ku-Eksodusi kaMose ukuthi:
Uyokwenza isihlangu sesifuba sokwahlulela, kube ngumsebenzi wengcweti yokuklama, usenze njengokwenziwa kwengubo yamahlombe; ngegolide, nangokuluhlaza, nangokububende nangelineni elicolekileyo lemicu ephothiweyo. Siyoba nezinhlangothi ezine ezilinganayo lapho siphindwe kabili. Uyosibeka ezisekelweni zamatshe, kube yizinhla ezine zamatshe. Kuyokubakhona izinkotho zegolide ezisekelweni zamatshe. Amatshe ayokuba njengamagama abantwana bakwa-Israyeli, abe yishumi nambili njengamagama abo. Yilelo nalelolitshe liyokuba negama lesinye sezizwe eziyishumi nambili (Eksodusi 28:15-21; 39:8-14),
nokuthi yiliphi itshe okumele lifakwe kusiphi isesekelo kukhonjiwe kulezoZahluko okucashunwe kuzo lempinda. Kuye futhi u-Eksodusi noLevi kuthiwa:
Isihlangu sesifuba kasiyukukhumuka engutsheni yamahlombe. U-Aroni uyoveza amagama abantwana bakwa-Israyeli esihlangwini sesifuba sokwahlulela phezu kwenhliziyo yakhe, lapho engena endaweni engcwele, kube yisikhumbuzo sikaJehovah njalo. Uyofaka esihlangwini sesifuba sokwahlulela i-Urimi neThumimi, kuhlale phezu kwenhliziyo ka-Aroni nxa engena phambi kukaJehovah. U-Aroni uyothwala ukwahlulelwa kwabantwana bakwa-Israyeli enhliziyweni yakhe phambi kukaJehovah njalo (Eksodusi 28:28-30; Levitekusi 8:7, 8).
Ukuthi uJehovah noma iNkosi kwakubuzwa kuYo maqede iphendule ngesu le-Urimi neThumimi kubonakala kuNumeri kaMose, lapho kuthiwa khona:
UJehovah wathi kuMose: Zithabathele uJoshuwa indodana kaNuni. Wena uyobeka udumo lwakho phezu kwakhe ukuze ibandla lonke labantwana bakwa-Israyeli lilalele. Yena uyokuma phambi kuka-Eleyazare umphristi, oyokumbuzela ngokunquma kwe-Urimi phambi kukaJehovah (Numeri 27:18, 20, 21).
NakuSamuweli kuthiwa:
USamuweli wabuza kuJehovah, kepha uJehovah kamphendulanga ngamaphupho, nange-Urimi, nangabaphrofethi (1 Samuweli 28:6).
