3571. Izahlukwana 26-29: Uyise u-Isaka wathi kuye: Ake usondele ungange, ndodana yami. Wasondela wamanga. Wahogela iphunga lezingubo zakhe, wambusisa, wathi: Bheka iphunga lendodana yami, linjengephunga lensimu ebusiswe nguJehovah. UNkulunkulu uyokupha amazolo ezulu, namanoni omhlaba, nenala yamabele neyewayini elisha. Abantu bayokukhonza, nabantu bayokukhothamela. Yiba yinkosi yabafowenu, namadodana kanyoko ayokukhothamela. Makaqalekiswe okuqalekisayo, abusiswe okubusisayo. Ukuthi “Uyise u-Isaka wathi kuye: Ake usondele” kufanekisa izinga lokubona ngengqondo elingaphakathi kunelingaphambili. Ukuthi “ungange, ndodana yami” kufanekisa ukubona ukuthi ukuhlangana kungabakhona noma kungenzeka yini noma qha. Ukuthi “Wasondela wamanga” kufanekisa ukubakhona kokuhlangana nokwenzeka kokuhlangana. Ukuthi “Wahogela iphunga lezingubo zakhe” kufanekisa ukuphuma okuthokozisayo kokulunga ayekubona ngengqondo, kuphuma eqinisweni. Ukuthi “wambusisa” kufanekisa ukuhlanganiswa noma ukuxhunywaniswa ngalelosu. Ukuthi “wathi: Bheka iphunga lendodana yami” kufanekisa intokozo ebonwa eqinisweni elizuzwa ekulungeni noma ngokulunga. Ukuthi “linjengephunga lensimu” kufanekisa ukuthi njengomhlabathi omuhle okuzuzwa kuwo iqiniso. Ukuthi “ebusiswe nguJehovah” kufanekisa ukuthi owandisiwe nochunyiswe ngokusukela eBunkulunkulwini. Ukuthi “UNkulunkulu uyokupha amazolo ezulu” kufanekisa ukuthi lokho kuvela eQinisweni loBunkulunkulu. Ukuthi “namanoni omhlaba” kufanekisa ukuthi kuvela futhi eKulungeni koBunkulunkulu. Ukuthi “nenala yamabele” kufanekisa ukulunga kwemvelo okuphuma kulokho Kulunga. Ukuthi “neyewayini elisha” kufanekisa iqiniso lemvelo eliphuma kulokho Kulunga. Ukuthi “Izizwe ziyokukhonza” kufanekisa amaqiniso eSonto. Ukuthi “izizwe ziyokukhothamela” kufanekisa amaqiniso azinze ekulungeni. Ukuthi “yiba yinkosi yabafowenu” kufanekisa ukubusa, ekuqaleni, kwenkanuko yokukhanukela iqiniso phezu kwezinkanuko zokukhanukela ukulunga. Ukuthi “amadodana kanyoko ayokukhothamela” kufanekisa ukubusa phezu kwazozonke ezinye izinkanuko zokukhanukela iqiniso. Ukuthi “Makaqalekiswe okuqalekisayo” kufanekisa ukuthi umuntu ozahlukanisayo naye uyokwahlukaniswa. Ukuthi “makabusiswe okubusisayo” kufanekisa ukuthi umuntu ozixhumanisayo noma ozihlanganisayo uyoxhunywaniswa.
